الجمعة، 1 يوليو 2011

اعلان نتائج الثانوية العامة 16 يوليو المقبل

قال مصدر مسئول بوزارة التربية التعليم إن الوزارة استقرت على إعلان نتيجة امتحانات الثانوية العامة خلال الفترة من 16 إلى 18 يوليو المقبل.

وأكد المصدر أن الدكتور أحمد جمال الدين موسى وزير التربية والتعليم، سيعتمد النتيجة وأسماء الطلاب الأوائل بالشعبتين العلمى والأدبى بعد عودته من رحلة عمل بالخارج فى 14 يوليو، وستنتهى الامتحانات بعد غد السبت.

إليكَ يـا .... زُمل

y, June 17, 2011 at 8:19pm

: ملاحظة خطيرة :) .... تعريف زُمل

الأولوية للغلابة اللي زيي طلاب الثانوية العامة وكل من لم يلتحق بها بعد

ولا يمنع هذا من أن يكون الكلام موجه لطلاب الكلية اللي هلتحق بيهم

عن قريب ان شاء الله ومتنسوش كلكوا كنتوا فـ يوم ثانوية عامة

:)

*´¨`*•.¸¸.* ¨`*•.

عزيزي طالب الثانوية العامة أتمنى انك تكون عايش وعقلك لسه فـ مكانه

عملت ايــه فـ اللي فـــــــات ؟؟

.

.

.

.

بــــــس بــس حاسة بيك ما هو كلنا فـ الهوا سوا وبنمر بحاجات غريبة فـ الامتحانات

يعني ... مادة متكونش مذاكرها كويس وتدخل متسبش فيها سؤال فاضي ومادة

تطلع فيها عينك ومتحلش حاجة وسؤال تكون لسة يدوب باصص عليه قبل ما تدخل

اللجنة على طول وييجي فـ الإمتحان ومتفتكرش منه حرف , يـاااااه غريبة الدنيا دي

مــش كــده ؟؟ ................... بس عمرك ما سألت نفسك هو ده بيحصل ليه ؟

طب عمرك مـ قـَليت بأصلك وقلت لــيــه يــــارب !! ده انا مذاكر وتعبان وسهران طول

الليل ومحلتش كويس والولا "أياً كان هو مين" حل أحسن مني لـــيـــه يـــــــــارب

لـــــــــيــــــــه ؟؟

وطول ما انت ماشي فـ طريق الإمتحانات بيقابلك امتحان حلو فـ تقول أيوه الحمدلله

هوصل للي أنا عايزه أهو , ويقابلك امتحان رخم فتقول لــيــه يـــارب ؟؟ , وغير جو

الإمتحانات الغريب اللي مش بنبقى مستحملين فيه حد يطلعولنا الناس اللي كل

مهمتهم فـ الحياه انهم يربكونا وكل شوية يفكرونا اننا ثانوية عامّة وده على أساس

ان احنا ناسيين مثلاً !! والمُربكين دول بتلاقيهم فـ كل حته ......... مرة يطلع يقولك

بصــوت حـنـيـِّـن : شــــد حـيـلـك ....... فتقوله وانت بتبصله بغتاته : الشدة عـ الله

وبعدين يكمل حديثه الشيِّق فـ يقولك : كــلـنـا مـستنيينك لازم ترفع راسنا يـا محمد

فتقوله : ربـــنـا يسهل ......................... غالباً نيته بتكون سليمة , بس أنا زيك

:D نفسي الناس دي تعرف انها كده بتوترَّنا مش بتساعدن بتاتاً

.

.

.

أو مثلاً بقى ... تـِبقي قاعدة فـ أوضتك يا منى فتسمعي مامتك وهي بتكلم جارتكو

وصديقتها العزيزة طنط سـِـهير فـ التليفون , فتقولها أيــــوه يا سِهير والله كلنا خايفين

البت منى قاعدة بتذاكر أهي بس لو مَجبتش نسبة السنادي هتضيَّع تعبها وتعبنا

عالفاضي ........ آه والنبي ادعيلها كتيييير ....... آه ......... آه صحيح عندك حق

عالعموم ربنا يستر يا حبيبتي

وانتي أو انتَ تكون بتذاكر , فـ الكلام ده يشحذ همتك جـــــداً

.

.

.

.

:D "حلوة يشحذ دي .... العربي بينفع والله"

المهم بقى همتك تتشحذ من هنا وانت تروح قافل الكتاب من هنا على طووووول وده من

كتر الحماسة اللي بتكون فيها طبعاً وبعدين تقعد ترسم .... تكتب ... أو تمسك موبايلك

وتفتح أي بلاي لست عندك وتهيَّص يا معلم ده لو مفتحتش نت طبعاً وكإنك فـ اجازة

شم النسيم

وتقول أنـــا مبضيَّعش وقت ده مجرد "بـريـك" مع انك عارف انه مش بريك وعارف انك بتهرب

لإنك خــايف مـ النتيجة وعايز تبطـَّل تفكير فـ طنط سِهـيـر , الحقيقة ان مـامتك بتكون خايفة

عليك فعلاً بس متعرفش انك سامعها وهي بتعبر عن خوفها ده

.

.

.

وبتكمـِّل امتحاناتك يا سيدي وانت خايف وقلقان ..... حاجة صعبة أوي انك تحس بإنك بترسم

مستقبلك ونص درجة ممكن تنقلك من مستوى لمستوى تاني خاااااالص وتبدأ تفكر

وتقول : طب افرض مثلاً مثلاً يعني إني

...............

:D

..................

مجبتش النسبة اللي أنا عايزها ومدخلتش الكلية اللي بحلم بيها واللي طبعاً بيحلموا بيها

(P_ q) أهلي كمان , وتتخيل بقى علامات الحزن فـ وش مامتك :( والحسرة فـ وش الوالد

والكآبة اللي هتكون فيها وبعدين تدخل كلية مش بتحبها وتتخرج متلاقيش شغل فـ تقعد

عـ القهوة وميبقاش ليك لازمة وتعيش عالة عـ المجتمع ولا تتجوز ولا تخلف وتعجز وتتعب

فتموت ............ وبعدين تصحى تاني عشان ده مـ الآخر

.

.

فيلم هندي

.

.

ايـه يا عم الجو ده !! .... يا زُمل ريَّح نفسك مـ التفكير الموضوع ببساطة إن لكل انسان فينا

طريق , من ساعة مـ اتخلق وهو بيمشي فيه , واتكتبله حاجة معينه فيها خير ليه وهي

أنسب حاجة لدماغه وامكانياته وهي اللي باب رزقه هيتفتح من خلالها وكل اللي مطلوب

منه إنه يعمل اللي عليه ويحاول يتعب حسب قدرته , متزعلش لما ييجي امتحان صعب

ويقلل فرصتك من كلية معينه , ممكن تكون اخترت لنفسك طريق بس الطريق ده مش

مناسب ليك , صحيح بتدعي وتقول يـــارب اجعلي فيه نصيب بس ممكن ربنا يكون كاتبلك

مستقبل أحسن بكتيييييير بـس فـ طريق تاني غير اللي انت اخترته لنفسك حتى لو كان

أقل شوية من اختيارك ما انت ممكن تدخل كلية من كليات القمة بس متجلكش فرصة

شغل حلوة , وممكن تدخل كلية عادية وتشتغل فـ وظيفة يكون مكتوبلك انك تمسك

منصب كبير فيها فـ المستقبل , أو ممكن تدخل كلية مش حاببها بس تقابل شريكة

حياتك فيها أو ممكن تدخلي كلية انتي مش عيزاها بس تتعرفي فيها على أخلص

وأعز صاحبة ليكي فـ المستقبل , ودي تدابير بتاعة ربنا وربنا حكيم وكريم أوي وانت

عارف كويس انه كريم وكبييييير أوي , ياما ستر عليك وانت غلطان وياما وقف جمبك

وساعدك مع انك كنت قاطع الصلا ومش جمبه , انت عارف انه كريم يبقى ليه تخاف ؟

وليه تفقد الثقة كده وتخلي أي حد يوترك ويخليك تقفل الكتاب , انت بتذاكر عشان انت

عايز تعمل اللي عليك وتوصل للمكان اللي ربنا كاتبهولك وده انت ملكش يد فيه بس

لازم متقصرش وتعمل كل اللي تقدر عليه عشان ربنا يقف جمبك ويوفقك وادعي يا زُمل

ان ربنا يكتبلك اللي فيه الخير وادعي ان الخير ده يكون هو اللي انت بتحلم بيه

.

.

اتعب واتوكل على ربنا وكمِّل مشوارك حتى لو قصرت فـ الأول وضيَّعت وقت كتير

وعدِّت خلاص امتحانات , انسى اللي فات ده اللي حصل كان واللي كان مش بنعرف

نرجعه بس بنقدر نصلحه , اللي جي بإييديك حاول تبقى عايز ده عشان اللي عايز

بــيــشــتــغــل بــجــد ولما بيقصَّر بـيفوق وبيعوَّض اللي فاته

وده مش كلام إنشا ومش خيالي أو مثالي زي ما ممكن تكون

فاكر .... ده كلام كل واحد دخل كلية مش حاببها ونجح وقدر

يحقق حاجة وعرف ساعتها ان ده كان الخير ليه

وندم على كل لحظة حزن عدِّت عليه وهو ف ثانوية عامّة

.

.

:D خــاف عشان لو مخفتش متبقاش طبيعي بصراحة

بس متخليش خوفك يسيّطر عليك

اضحك ومن قلبك وطمن أهلك

قولهم أنا بتعب وهوصل للي

ربنا كاتبه , وخليك واثق ان ربنا

عمره ما هيضيَّع تعبك عـ الفاضي

.

.

ربنا يوفقك وبالله عليك السلام أمانة لطنط سِهير

*´¨`*•.¸¸.* ¨`*•.

الكلام ده مش من طالب متفوق دحيح ومثالي

الكلام ده من طالب لقى ان حلمه بيضيع من بين ايديه

عشان اكتشف فجأة انه بيعشق محافظته اللي مفهاش الكلية

اللي بيحلم بيها , قعد يفكر كتييييير وتعب أوي لحد ما وصل

للكلام اللي فوق ده ....... أنا بعمل اللي عليا وفـ انتظار الخير

اللي ربنا كاتبوهلي وأياً كان هو ايه أنا هرضى بيه

وكله دلوأتي بيتحل وبيمشي بالكورسات

:D

* لو حسيت إنه يستحق التشيير شـيَّر من غير ما تستأذن

ولو حسيت إنه فيه أي نوع من أنواع السلبيه

أرجوووك نبهني وإوعى تشيَّر

*آسفة عالإطالة

وآسفة لإني مش هرد عالكومنتات

دلوأتي "لو كان فيه" :) سامحوني

كلها اسبوع وأخلص

ربنا يسعد أيامكوا

:)

آلاء عبدالستار

الجمعة 17/6/2011