تنبيه خطير إلى كل طلبة ثانوية عاكة..احم اقصد عامة

السلام عليكم ورحمة الله وبركاته

في وسط زحمة الامتحانات ربما تمر الكثير من الامتحانات على خير ،، ربما يملأ الكثير من اللجان الهدوء

ولكن للأسف ، يتطرق الغش إلى بعض اللجان الأخرى التي غاب ضمير طلابها أو مراقبيها وحتى ذوي أمر الطلاب الذين أحلوا لهم غشهم أو أقنعهوهم بأن سبيل للتفوق

أحببت فقط أن أنبه كل طالب ثانوية عامة تسول له نفسه بأن يغش

عزيزي الطالب

بعد أن تنتهي امتحاناتك على خير ، أؤكد لك لن يمر الباقي على خير

فبعد أن تتخرج بسلامتك من الكلية التي دخلتها بالغش

ويقدر الله أن تعمل ،، فلن تكون أموالك حلالا

تخيل نفسك بعد 6 سنين على الأقل من الأن

تعيش وتنام وتأكل وتشرب من حرام ..وربما لست وحدك فربما تكون قد تزوجت وأنجبت "العيال"

كيف يسمح لك ضميرك ؟؟ أن تتشارك مع طالب في كلية قمة مقعده ؟؟ وهو قد ذاكر حتى بح صوته وضعف نظره ؟؟ وأنت بسلامتك

قد "غشيت"

عفوا على التأنيب الحاد

ولكني لن أسمح لأمثالك بأن يضيعوا جهد كل من يتعب

ولا أريد أن أراك بجواري يوما ما على "دكة" واحدة في الكلية .

Nariman

26يونيو2011 الأحد

قبل أن تدخل ثانوية عامة أو حتى لو كنت فيها

قبل أن تدخل ثانوية عامة أو حتى لو كنت فيها

السلام عليكم ورحمة الله وبركاته

أعزائي طلبة الثانوية الهامة ..بما أننا زملاء في مركب واحد

وستجمعنا رابطة واحدة ،فيحتم عليا ضميري كإنسانة أن أنصح نفسي وأنصحكم نصايح

في ثانوية عامة قبل الامتحانات بأسبوعين أو أسبوع هتبدأ تنتشر بعض الأخبار السلبية عن الطلبة واللي موت نفسه واللي انتحر واللي واللي ..

نصيحة لله في لله والله عشانك مش عشان حد بلاش تعد تقرا الأخبار دي السلبية دي

واللي المفروض الصحفيين يتقوا ربنا وماينشروهاش

فبلاش تقرا الحاجات دي أبدااااا ولا حتى تتفرج عليها في تلفزيون وإلخ..

لو ليك زميل مش بيذاكر وبيعد يصعبها عليك من أولها ويحبطك ويكرهك في المذاكرة ويعد يقولك أوف دا صعب أووي شكلنا مش هننجح والكلام المقرف دا

نصيحة لله في لله بردوا متعدش معاه كتير ،عشان شوية بشوية غصبا عنك ممكن تصدق الكلام دا او حتى يتملكك شعور بالكسل والاحباط والسلبية وفقد الأمل من الدنيا واللي فيها

لو سلامتك بئا في أولى ثانوي زي حالاتي كدا

وبتتفرج على أخبار امتحانات الثانوية العامة السنة دي زي حالاتي كدا بردوا وسمعت ان الامتحانات جات رخمة او فيها تكات او حتى امتحانات جات كلها صعبة

فبلاش تخلي دا يبقى حكمك على الامتحانات من أولها وذلك لعدة أسباب<<بتتفلسف

1-اللي بيكلم دا انتا متعرفش هو كان بيذاكر ولا لأ <<احتمال يكون عيل مش بتاع مذاكرة أساسا فطبيعي هيقولك الامتحان صعب حتى لو النملة حلته

2-اللي بيكلم دا واحد من 200 الف واحد او اكتر على مستوى الجمهورية كلها <<ازاي تاخد بحكم واحد وتنسى بقية الطلبة اللي في الجمهورية<<دا حتى يبقى ظلم يا أخي

حاجة كمان : حط في بالك ان الامتحانات لازم يجيبوا فيها حاجات صعبة او مستوى الطالب المتفوق عشان يميزوا اللي مذاكر من اللي مش مذاكر او يميزوا مين حل اكتر وفهم اكتر عن غيره وبذل جهد اكتر

يعني حضرتك كدا تخش الامتحان تكون حاطط في دمااغك ان اكيد في حاجة محتاج لف ودوران في الامتحان عشان لما تشوفها مايجليكش صدمة عصبية ولا حاجة وتنهار يبقى بالنسبة لك الموضوع عادي جدا<<ودا هساعد عليه انك تحل تكات من اول السنة

حاجة كمان : اعمل حسابك تذاكر كويس اوي من اول السنة عشان ماتزقش نفسك ليلة الامتحان وتبقى هايص لايص وكله داخل في بعضه ويبقى البيت زي اوضة الطوارئ

اتعب من اول السنة عشان يدوبك قبل الامتحان الوقت يكفيك تراجع لكن ماتجيش ليلة الامتحان تقول هذاكر من جديد..

كمان ليلة الامتحان ماتعدش تتوتر جامد وتجيب لنفسك المرارة او تعدي تعيطي وتترعبي والذي منه لان دا مش في صالحك بالعكس هيخليك متعرفش تحل حاجة ابداااا انا اعرف حد عمل كدا جا في الامتحان نسا سؤال لانه ماشافوش اساسا لان كان داخل متوتر جاااامد..تخيل بئا سيادتك تنسى سؤال !!! لا قدر الله

وحط هدفك دايما قدام عينيك كل ماتضعف وتكسل وتكره المذاكرة افتكر انك عايز تبقى"كذا" مهما كان حلمك ،، ولازم تعرف ان كل حلم محتاج مجهود عشان يتحقق

يعني اللي عايز طب مش زي اللي عايز هندسة وهكذا..

خلي لك ساعة على الاقل كل يوم راحة لان احنا بني آدمين ومحتاجين نشحن عشان نقدر نواصل لكن لو كله ورا بعضه هتلاقي نفسك مرة واحدة فصلت !!!!

حل امتحانات كتير من اول السنة ودرب نفسك على وقت الاجابة عشان يوم الامتحان ماتفاجأش بأن الوقت خلص وانتا لسا بتجاوب

والله ولي التوفيق

لا تنسوني من دعائكم

Nariman